आक्षेपार्ह मजकुरामुळे तरुणावर गुन्हा
नवी मुंबई, ता.१३ (वार्ताहर): डॉ. बाबासाहेब आंबेडकर यांच्याविषयी समाजमाध्यमांवर आक्षेपार्ह टिप्पणी करणाऱ्या युवकाला आंबेडकरी अनुयायांनी बेदम मारहाण केली होती. या प्रकरणी तुर्भे पोलिसांनी ॲट्रॉसिटी ॲक्टनुसार गुन्हा दाखल केला आहे.
तुर्भे स्टोअर्स परिसरातील चंदन सिंगने (३०)व्हॉट्सअॅप स्टेटसवर डॉ. बाबासाहेब आंबेडकर यांच्याबद्दलचा आक्षेपार्ह व्हिडिओ शेअर केला होता. हा आक्षेपार्ह व्हिडिओ तुर्भे स्टोअर परिसरातील आंबेडकरी अनुयायांच्या निदर्शनास आल्यानंतर त्यांनी चंदनला बेदम मारहाण केली. या प्रकरणात तुर्भे पोलिस ठाण्यात तक्रार दाखल झाल्यानंतर पोलिसांनी भारतीय दंड संहिता कलम १९६ तसेच अनुसूचित जाती व अनुसूचित जमाती (अत्याचार प्रतिबंध) अधिनियम १९८९ मधील कलम ३१ (r) अंतर्गत गुन्हा नोंदविला आहे. तर जखमी चंदन सिंगला रुग्णालयात दाखल करण्यात आले आहे.