कर्जत तालुक्यात महिलांना संधी
सर्वसाधारण आरक्षण नसल्याने इच्छुकांचा हिरमोड
कर्जत, ता. १३ (बातमीदार)ः रायगड जिल्हा परिषद, पंचायत समितीची आरक्षण सोडत जाहीर झाली आहे. आरक्षण सोडतीत महिलांना संधी मिळाली असून, जिल्हा परिषद विभागांमध्ये एकही सर्वसाधारण नसल्याने स्थानिक बड्या नेत्यांना धक्का बसला आहे.
पंचायत समिती कर्जतच्या सभापतीपदासाठी नागरिकांचा मागास प्रवर्ग (ओबीसी) आरक्षण जाहीर झाले आहे. त्यामुळे या पदासाठी ओबीसी प्रवर्गातील नेत्यांमध्ये उत्सुकता वाढली आहे. त्यात मोठे वेणगाव (ओबीसी), पोशीर (ओबीसी महिला) आणि उकरूळ (ओबीसी महिला) हे तीनही गण या प्रवर्गांत येत असल्याने सभापतीपदासाठी दावेदारांची चुरस रंगण्याची शक्यता आहे. कर्जत तालुक्यातील माणगावतर्फे वरेडी, नेरळ दोन्ही जिल्हा परिषद विभाग सर्वसाधारण महिला प्रवर्गात आले आहेत. त्यामुळे महिला उमेदवारांना जिल्हा परिषद अध्यक्षपदासाठीची संधी उपलब्ध झाली आहे.