आसनगाव औद्योगिक वसाहतीत अग्नितांडव
प्लॅस्टिक कारखाना राख

शहापूर, ता. १३ (वार्ताहर) : शहापूर तालुक्यातील आसनगाव औद्योगिक वसाहतीतील एसकेआय नावाच्या कारखान्यात सोमवारी (ता. १३) सकाळच्या सुमारास भीषण आग लागून संपूर्ण कारखाना खाक झाला. या आगीत कोणतीही जीवितहानी झाली नसली तरी कोट्यवधी रुपयांचे आर्थिक नुकसान झाले.
मिळालेल्या माहितीनुसार, आसनगाव औद्योगिक वसाहतीतील एसकेआय हा प्लॅस्टिकच्या विविध उपकरणांचे उत्पादन करणारा कारखाना असून, कारखान्यात मोठ्या प्रमाणावर प्लॅस्टिकचा साठा असल्याने आग क्षणार्धात पसरली आणि काही वेळातच तिने भीषण रूप धारण केले. घटनेची माहिती मिळताच शहापूर नगरपंचायत, भिवंडी आणि कल्याण डोंबिवली पालिकेच्या अग्निशमन दलाच्या गाड्या घटनास्थळी दाखल झाल्या. आगीची तीव्रता एवढी मोठी होती, की आकाशात उठलेले धुराचे मोठे लोट दूरपर्यंत दिसत होते. ही आग इतस्ततः पसरू नये, यासाठी अग्निशमन दलाच्या जवानांनी प्राधान्याने प्रयत्न केले. स्थानिक नागरिकांनीही आग आटोक्यात आणण्याचे प्रयत्न केले; मात्र तीव्रतेमुळे ते प्रयत्न अपयशी ठरले. त्यामुळे अग्निशमन दलाला बोलावण्यात आले. आगीचे नेमके कारण अद्याप स्पष्ट झालेले नाही.