अंबरनाथ, ता. १३ (वार्ताहर) : शहरात दिवसाढवळ्या चोरीच्या घटनेने पुन्हा एकदा सुरक्षा व्यवस्थेवर प्रश्नचिन्ह निर्माण केले आहे. एका व्यावसायिकाची महागडी गाडी फोडून चोरट्यांनी तब्बल २५ हजारांची रोकड लंपास केली. ही घटना शहरातील कल्याण-बदलापूर राज्य मार्गावर शुक्रवारी दुपारी साडेतीनच्या सुमारास घडली. याप्रकरणी अंबरनाथ पोलिस ठाण्यात गुन्हा दाखल करण्यात आला आहे. मिळालेल्या माहितीनुसार, राजेंद्र घुले (वय ३१) हे व्यावसायिक असून, त्यांनी कार पश्चिमेच्या व्हीए बिझनेस सेंटर येथे शुक्रवारी उभी केली होती. गाडीच्या मागील बाजूकडील सीटची काच फोडून २५ हजारांची रोकड लंपास झाल्याची घटना घडली. अंबरनाथ पोलिसांनी चोरट्याविरोधात गुन्हा दाखल करून तपास सुरू केला आहे. नागरिकांनी या घटनेनंतर सावधगिरी बाळगण्याचे आवाहन पोलिस प्रशासनाकडून करण्यात आले आहे.