डहाणू, ता. १४ (बातमीदार) : देशासह राज्य, त्याचबरोबर पालघर जिल्हाध्यक्ष भरतसिंग राजपूत यांच्या कार्यावर विश्वास ठेवून विविध राजकीय पक्षांतील अडीच हजार कार्यकर्त्यांनी भाजपमध्ये प्रवेश केला. त्यांचे स्वागत करून त्यांनी विश्वासाने काम केल्यास आगामी जिल्हा परिषद निवडणुकीत भाजपचा अध्यक्ष विराजमान होत भाजपची निर्विवाद सत्ता येईल, असा विश्वास भाजपचे पालघर जिल्हाध्यक्ष भरतसिंग राजपूत यांनी व्यक्त केला. डहाणूतील दशाश्री माळी सभागृहात भाजपचे पालघर जिल्हा पदाधिकारी बैठक व पक्षप्रवेश कार्यक्रम आयोजित केला होता. या कार्यक्रमाला खासदार डॉ. हेमंत सवरा, आमदार हरिश्चंद्र भोये, जगदीश राजपूत, बाबाजी काठोळे, सुशील अवसरकर, प्रकाश निकम आदी विविध पदाधिकारी उपस्थित होते. यात पालघरचे कैलास म्हात्रे, कुणाल पाटील यांच्यासह विविध पदाधिकाऱ्यांचा समावेश आहे. जिल्हाध्यक्ष भरतसिंग राजपूत यांच्या कुशल आणि सक्षम नेतृत्वगुणामुळे पालघर जिल्ह्यात एक खासदार, चार आमदार निवडून आणले, असे सांगत, भाजपमध्ये पदाला महत्व नसून, त्यांच्या कार्याला महत्त्व आहे. भाजप पक्ष हा सामान्य माणसाला केंद्रबिंदू मानून, काम करत असतो, असे खासदार डॉ. सवरा यांनी सांगितले.