बोळिंज, ता. १६ (बातमीदार) : विरार पश्चिमेच्या ग्लोबल सिटी परिसरात ‘वचनपूर्ती जल उत्सव’ कार्यक्रमादरम्यान रस्ता अडविल्याच्या कारणावरून गोंधळ निर्माण झाला होता. रस्ता अडवून कार्यक्रम घेतल्याचा दावा नागरिकांनी केला होता. या गोंधळामुळे राजकीय वातावरण चांगलेच पेटले होते. महिलेसोबत अश्लील वर्तन केल्याप्रकरणी आरोपीला पकडण्यास पोलिसांना उशीर होत असल्याने सर्व पक्षांकडून आक्रोश करण्यात आला. तसेच आरोपीला न पकडल्यास आम्ही त्याला पकडू, असा इशारा मनसे नेता अविनाश जाधव यांनी दिला आहे.

कार्यक्रमादरम्यान दोन्ही बाजूला रस्ता का अडवला, याची विचारणा करण्यासाठी बहुजन विकास आघाडीचे कार्यकर्ते गेले होते. परंतु, गोंधळ झाल्यानंतर या कार्यकर्त्यांना बोळिंज पोलिस ठाण्यात बसवून ठेवण्यात आले होते. यानंतर कार्यकर्त्यांना सोडवण्यासाठी, तसेच त्या ठिकाणी कार्यकर्त्यांसोबत झालेल्या वर्तणुकीबाबत प्रश्न विचारण्यासाठी माजी आमदार क्षितिज ठाकूर पोलिस ठाण्यात आले, तसेच बविआचे कार्यकर्ता, पदाधिकारीदेखील जमा झाले. या ठिकाणी वादानंतर तिथे महिलेसोबत एका व्यक्तीकडून अश्लील वर्तन करण्यात आले. यानंतर बोळिंज पोलिस ठाण्यामध्ये गुन्हा दाखल झाला आहे, मात्र अद्यापही आरोपी सापडला नसल्याने मनसे, शिवसेना ठाकरे गट, तसेच बहुजन विकास आघाडीचे पदाधिकारी यांनी एकत्रित पत्रकार परिषद घेतली. या वेळी अविनाश जाधव, शिवसेना ठाकरे गटाचे जनार्दन पाटील, तर बहुजन विकास आघाडीचे माजी महापौर रुपेश जाधव उपस्थित होते.