शंकर मंदिरात आढळले कोंबडीचे मांस
बोईसर, ता. १६ (बातमीदार) : पालघर तालुक्यातील उमरोळी येथील श्री शंकर मंदिरामध्ये अभिषेक कमंडलूत गुरुवारी (ता. १६) सायंकाळी साडेसहा वाजण्याच्या सुमारास कोंबडीचे मांस आढळल्याने ग्रामस्थांमध्ये संतप्त वातावरण निर्माण झाले आहे. याप्रकरणी एक संशयित व्यक्तीला पोलिसांनी चौकशीसाठी ताब्यात घेतले असून, अज्ञात व्यक्तीविरोधात गुन्हा दाखल करण्यात आला आहे. परिसरात तणावाचे वातावरण निर्माण झाल्यामुळे पोलिसांचा मोठा फौजफाटा घटनास्थळी दाखल होता. पालघर पोलिसांकडून तपास सुरू असून, उपविभागीय अधिकारी प्रभा राऊळ, पोलिस उपअधीक्षक (गृह) रवींद्र नाईक यांनी घटनास्थळी भेट दिली.