ठाणे पालिकेत तिसऱ्या अतिरिक्त आयुक्तांची होणार एण्ट्री
पदाला प्रशासकीय मान्यता
सकाळ वृत्तसेवा
ठाणे, ता. १८ ः ठाणे महापालिकेच्या कामकाजाचा व्याप आणि शहराच्या झपाट्याने होणारा विकास लक्षात घेता, पालिकेत तिसरे अतिरिक्त आयुक्त पद निर्माण करण्यास प्रशासकीय सभेने मंजुरी दिली आहे. पालिकेच्या वाढत्या कामकाजाचा आणि शहराच्या विकासाच्या गतीचा विचार करून हा निर्णय घेण्यात आला. यामुळे प्रशासकीय कार्यक्षमता अधिक बळकट होणार असल्याची अपेक्षा व्यक्त करण्यात येत आहे.
शहराच्या विस्ताराबरोबरच प्रकल्पांची संख्या आणि जबाबदाऱ्या वाढत असल्यामुळे, प्रशासनाने आणखी एक पद निर्माण करण्याचा प्रस्ताव सादर केला होता. पालिकेच्या विविध योजनांची अंमलबजावणी, नागरी सुविधा पुरवठा, नव्या प्रकल्पांच्या व्यवस्थापनासाठी अतिरिक्त अधिकाऱ्यांची गरज भासत असल्याचे प्रशासनाने स्पष्ट केले आहे. त्यामुळे तिसरे अतिरिक्त आयुक्तपद निर्माण करून, महापालिकेच्या कामकाजाला अधिक गती देण्याचा उद्देश आहे. या प्रस्तावास महापालिकेच्या प्रशासकीय सभेने मंजुरी दिली असून, लवकरच या नव्या पदासाठी प्रक्रिया सुरू होणार आहे. दरम्यान, सध्याच्या घडीला ठाणे पालिकेच्या आस्थापनेवर सध्या दोन अतिरिक्त आयुक्त कार्यरत आहेत. यामध्ये संदीप माळवी (पदोन्नतीवर) आणि प्रशांत रोडे (प्रतिनियुक्तीवर) आहेत.