देव्हाऱ्यातील दिव्याने घराला आग
सकाळ वृत्तसेवा
ठाणे, ता. १९ ः घोडबंदर रोडवरील कासारवडवली पोलिस ठाण्याच्या समोरील पार्क वूड सोसायटीच्या नवव्या मजल्यावरील घरात आग लागली होती. ही आग देव्हाऱ्यातील दिव्यामुळे लागली असून यामध्ये घराचे नुकसान झाले आहे. ही घटना शुक्रवारी (ता. १७) घडली. सुदैवाने या घटनेत कोणालाही दुखापत झाली नसल्याची माहिती आपत्ती व्यवस्थापन कक्षेने दिली.
पार्क वूड सोसायटीमधील नवव्या मजल्यावर गुलशन हमरापूरकर यांच्या रूममध्ये भाडेकरू म्हणून अभिजित राव हे कुटुंब राहत आहे. शुक्रवारी रात्रीच्या सुमारास रूममधून धूर येत असल्याची माहिती बाळकुम अग्निशमन केंद्रातून आपत्ती व्यवस्थापन कक्षेला देण्यात आली. या घटनेची माहिती मिळताच, घटनास्थळी अग्निशमन दलाच्या जवानांनी धाव घेत, पाऊण तासात आगीवर नियंत्रण मिळविण्यात त्यांना यश आले. सुदैवाने या घटनेत कोणालाही दुखापत झाली नसली तरी मालमत्तेचे नुकसान झाले आहे.