कबड्डी स्पर्धेत सानपाडा शाळेचा दमदार विजय
नेरूळ, ता. १९ (बातमीदार) ः क्रीडा व युवक सेवा संचालनालय, राज्य अंतर्गत जिल्हा क्रीडा परिषद व जिल्हा परिषद अधिकारी कार्यालय यांच्या सहकार्याने जिल्हास्तरीय शालेय क्रीडा स्पर्धांचे आयोजन करण्यात आले होते. डॉ. सी. व्ही. सामंत महाविद्यालय, तुर्भे येथील शाळेच्या मैदानात तीन दिवस जिल्हास्तरीय शालेय कबड्डी स्पर्धा पार पडल्या. जिल्हास्तरीय शालेय कबड्डी स्पर्धेत १४, १७ व १९ वर्षांखालील मुले व मुलींच्या गटात एकूण २२४ संघांनी सहभाग घेतला होता.
या स्पर्धेतील १४ वर्षांखालील वयोगटातील मुलांचा अंतिम सामना मुंबई महापालिका शाळा क्रमांक १८ सानपाडा आणि रा. फ. नाईक महाविद्यालय, कोपरखैरणे यांच्यात झाला. या सामन्यात सानपाडा शाळेच्या संघाने अत्यंत चुरशीच्या लढतीत २८ः२५ अशा तीन गुणांच्या फरकाने जिंकत अजिंक्यपद पटकावले व मुंबई विभागीय स्पर्धेसाठी पात्र ठरला आहे. या स्पर्धेतील १७ वर्षांखालील मुलांच्या गटातील डॉ. सी. व्ही. सामंत विद्यालय, तुर्भे यांच्यासोबत झालेल्या सामन्यात रा. फा नाईक महाविद्यालय कोपरखैरणे शाळेच्या संघाने अंतिम बाजी मारली. या स्पर्धेतील १९ वर्षांखालील मुलींच्या गटातील अंतिम सामन्यात रा. फ. नाईक महाविद्यालय बोनकोडे आणि कोपरखैरणे कॉलेजच्या संघ मुंबई विभागीय स्पर्धेसाठी पात्र ठरला आहे.