छत्रपती शिवाजी महाराजांच्या स्मारकाची स्वच्छता
कल्याण, ता. १९ (बातमीदार) ः खडेगोळवली परिसरातील शिवरत्न चौक परिसरात असलेले छत्रपती शिवाजी महाराजांचे ऐतिहासिक ‘जिरे टोप’ स्मारक हे या भागातील एकमेव स्मारक म्हणून ओळखले जाते. या स्मारकाची दिवाळीच्या पहिल्या दिवशी भक्तिभावाने स्वच्छता करून पूजन, तसेच दीपप्रज्वलन करून दिवाळीचा प्रारंभ करण्यात आला. त्याचबरोबर छत्रपती शिवाजी महाराज चौकातही ही मोहीम राबवून शिवरायांना मानवंदना देण्यात आली.

स्थानिक नागरिक आणि शिवप्रेमींच्या उपस्थितीत झालेल्या या उपक्रमादरम्यान छत्रपती शिवाजी महाराज यांच्या कार्याचा गौरव करण्यात आला. उपस्थितांनी महाराजांप्रती कृतज्ञता व्यक्त करताना सांगितले, की आज आपण हिंदू म्हणून जिवंत आहोत ते शिवराय आणि त्यांच्या मावळ्यांनी सांडलेल्या रक्तामुळेच. आपल्या संस्कृतीतील देवळातील देव, तुळशीचे स्थळ, महिलांच्या कपाळाचे कुंकू आणि आपल्या सण-उत्सवांची परंपरा सर्व शिवरायांच्या प्रेरणेतून आजही जपली जाते. दिवाळीचा पहिला दिवा हिंदुस्थानच्या भाग्यविधात्या, धर्मसंरक्षक आणि राष्ट्रदोलनाचे प्रतीक असलेल्या छत्रपती शिवाजी महाराजांना अर्पण करत त्यांच्या स्मृतींना वंदन करण्यात आले. कार्यक्रमात स्थानिक नागरिकांसह युवकांनी उत्साहाने सहभाग घेतला होता.