अंबरनाथ, ता. २१ (बातमीदार) : दिवाळीच्या मुहूर्तावर सायंकाळी अचानक मुसळधार पावसाने नागरिकांचे आणि विक्रेत्यांचे उत्साह विरजून टाकले. लक्ष्मीपूजनाच्या दिवशी बाजारपेठ सजली असतानाच आलेल्या पावसामुळे नागरिकांची तारांबळ उडाली आणि विक्रेत्यांना मोठ्या अडचणींना सामोरे जावे लागले.
दिवाळीनिमित्त मंगळवारी (ता. २१) बाजारात खरेदीसाठी गर्दी करत असताना अचानक आलेल्या ढगांचा गडगडाट, विजांचा कडकडाट आणि मुसळधार पावसामुळे वातावरण आनंददायी न राहता निराशाजनक झाले. अवकाळी पावसाने पथविक्रेते आणि फटाके विक्रेत्यांमध्ये तणाव निर्माण केला. अनेक विक्रेत्यांचे साहित्य पाण्यामुळे खराब झाले, तर काहींनी आपले सामान प्लास्टिकने झाकून परिस्थितीशी सामना करण्याचा प्रयत्न केला. ऐन दिवाळीच्या दिवशी अचानक आलेल्या पावसामुळे अनेकांना मनस्ताप झाले, काही विक्रेत्यांच्या दिवसाचे उत्पन्नही नष्ट झाले. सणाच्या आनंदात मुसळधार पावसाने व्यापाऱ्यांमध्ये नाराजी निर्माण केली. काही भिजत खरेदी करत होते.

अंबरनाथ : बाजारपेठेत मुसळधार पावसात धावपळ करताना नागरिक आणि विक्रेते.