मुंबई : भाऊबीज सणानिमित्त गुरुवारी (ता. २३) प्रवाशांच्या सोयीसाठी मुंबई शहर, पूर्व, पश्चिम उपनगर, मिरा रोड, भाईंदर, ठाणे आणि नवी मुंबईसाठी बेस्ट प्रशासनाने १३४ बेस्टच्या गाड्या सोडण्याचा निर्णय घेतला आहे. मिरा रोड, भाईंदर, ठाणे शहरातील मॅरेथॉन चौक, कोपरी, कॅडबरी जंक्शन, दादलानी पार्क या ठिकाणी तसेच नवी मुंबई परिसरात कोपरखैरणे, नेरूळ, ऐरोली, घणसोली गाव, सीबीडी बेलापूर या ठिकाणी विविध बसमार्गावर १३४ बस गाड्या सोडण्यात येणार आहेत. गर्दीच्या बसथांब्यावर तसेच रेल्वेस्थानकाबाहेरील बसथांब्यांवर बस निरीक्षक आणि वाहतूक अधिकाऱ्यांची नेमणूक करण्यात आली आहे. दरम्यान, जादा गाड्यांच्या सेवेचा प्रवाशांनी लाभ घ्यावा, असे आवाहन बेस्ट प्रशासनाने केले आहे.