पर्यटकांचा धुळीशी सामना
खालापूर, ता. २३ (बातमीदार)ः खालापूरहून जिल्ह्याच्या ठिकाणी जाण्यासाठी पेणमार्गे प्रवास करावा लागतो, पण अनेक वर्षे हा मार्ग रखडला असल्याने खोपोली-पेण राज्यमार्गावरून खड्ड्यांसोबत धुळीचा सामना प्रवाशांना कारावा लागत आहे.
खालापूर हद्दीत राज्यमार्गाचे काम पूर्ण झाले आहे. त्यामुळे प्रवाशांची खराब रस्त्याच्या कटकटीतून सुटका झाली आहे, मात्र तालुक्याची वेस ओलांडताच राज्य मार्गाची दुरवस्था झाली आहे. आराव गावापासून गागोदे खिंड ओलांडेपर्यंत प्रवाशांची दमछाक होत आहे. रस्त्याचे रखडलेले काम, खड्डे आणि प्रचंड धुळीमुळे प्रवास अतिशय कठीण झाला आहे. रस्ता पूर्ण होण्यापूर्वीच खालापूर हद्दीत टोलनाका सुरू करण्यात आला आहे. सध्या टोलवसुली होत नसली तरी एवढी तत्परता रस्ता डागडुजीसाठी दाखवली असती, तर प्रवाशांचा त्रास कमी झाला असता, अशी भावना आहे.