दागिने घेऊन दोन महिलांचे पलायन
सीसीटीव्ही फुटेजच्या मदतीने तपास सुरू
अंधेरी, ता. २६ (बातमीदार) ः जुन्या सोन्याच्या दागिन्यांच्या मोबदल्यात नवीन सोन्याचे दागिने खरेदी करण्याचा बहाणा करून दोन महिलांनी बोगस दागिने देऊन एका ज्वेलर्स व्यवस्‍थापकाची सुमारे साडेनऊ लाखांची फसवणूक केल्याचा प्रकार दहिसरमध्ये उघडकीस आला आहे. पळून गेलेल्या दोन्ही महिलांविरुद्ध दहिसर पोलिसांनी फसवणुकीचा गुन्हा नोंदवून तपास सुरू केला आहे.
शॉपसह परिसरातील सीसीटीव्ही फुटेज पोलिसांनी ताब्यात घेतले असून, या फुटेजवरून महिलांची ओळख पटविण्याचे काम सुरू आहे. भावेश मदनलाल जैन हे त्यांच्या पत्नी आणि दोन मुलांसोबत मिरा रोड येथे राहतात. दहिसर येथील शांतीवन, धर्मा पॅलेस इमारतीमध्ये पालखी ज्वेलर्स नावाचे एक शॉप असून, याच शॉपमध्ये मॅनेजर म्हणून ते काम करतात. १२ ऑक्टोबरला दोन महिला एका बाळाला घेऊन सोन्याचे दागिने खरेदीसाठी आल्‍या होत्‍या. या वेळी एका महिलेने तिचे लग्न असल्याचे सांगून त्यांच्याकडील जुने दागिने विकून नवीन दागिने खरेदी करायचे असल्याचे सांगितले. महिलांनी त्यांना चार सोन्याची चेन, एक ब्रेसलेट, एक सोन्याच्या कानातले जोड, असे १८८ ग्रॅम वजनाचे सोने दिले होते.