जाब विचारणे पालकांना भोवले
तीनवर्षीय मुलाला शाळेतूनच काढले
नवी मुंबई, ता. २७ (वार्ताहर) : सीबीडी-बेलापूर सेक्टर-८ मधील प्री-स्कूलमध्ये तीनवर्षीय मुलाला महिलेने मारहाण केल्याचा जाब पालकांनी विचारला म्हणून मुलाला शाळेतून काढून टाकण्यात आले आहे. या घटनेनंतर सीबीडी पोलिसांनी प्री-स्कूल चालक- मालकांविरोधात गुन्हा दाखल केला आहे.
सीबीडी-बेलापूर परिसरात राहणारा तीनवर्षीय पीडित मुलगा सेक्टर-८ मधील एबीसी प्री-स्कूलमध्ये शिक्षण घेत होता. पीडित विद्यार्थ्याने खेळताना दुसऱ्या विद्यार्थ्याचे केस पकडले. या कारणावरून शिक्षिकेने बेदम मारहाण केल्याचा आरोप पीडित मुलाच्या आईने केला होता. तसेच शाळेला ई-मेल पाठवून सीसीटीव्ही फुटेजची मागणी केली होती. या प्रकारानंतर पीडित मुलाला वर्गातून तसेच इतर उपक्रमांपासून वेगळे ठेवण्यात येत होते. त्यानंतर प्री-स्कूल चालकांनी पीडित मुलाला मारहाण करणाऱ्या महिलेला कामावरून काढल्याचे सांगत क्षमा मागितली. तसेच मुलाचे नाव शाळेच्या यादीतून काढल्याचे सूचित केले. प्रमाणपत्रदेखील ईमेलद्वारे पाठवण्यात आले होते. या प्रकारानंतर पीडित मुलाच्या आईने प्रतिनिधींशी संपर्क साधण्याचा प्रयत्न केला असता, त्यांनी प्रतिसाद दिला नाही. त्यानुसार चालक- मालकांविरोधात गुन्हा दाखल केल्याची माहिती वरिष्ठ पोलिस निरीक्षक अरुण पवार यांनी दिली.