माथाडी कामगारांचा आज संवाद मेळावा

तुर्भे, ता. २९ (बातमीदार) ः महाराष्ट्र राज्य माथाडी, ट्रान्स्पोर्ट आणि जनरल कामगार युनियनचे गुरुवारी (ता. ३०) सायंकाळी पाच वाजता एपीएमसी कांदा-बटाटा मार्केटच्या तुर्भे येथील लिलावगृहात माथाडी कामगारांचा मेळावा व पश्चिम महाराष्ट्रातील नवी मुंबईच्या रहिवाशांशी संवाद मेळावा आयोजित केल्याचे माथाडी कामगार नेते सरचिटणीस व माजी आमदार नरेंद्र पाटील यांनी सांगितले. उपमुख्यमंत्री एकनाथ शिंदे यांच्या प्रमुख उपस्थितीत हा कार्यक्रम होणार आहे. या मेळाव्यास पर्यटनमंत्री शंभूराज देसाई, उद्योगमंत्री उदय सामंत, ठाणे लोकसभेचे खासदार नरेश म्हस्के आदी मान्यवर उपस्थित राहणार आहेत. माथाडी कामगार व नवी मुंबईतील रहिवाशांच्या नगरविकास खात्याअंतर्गत असलेल्या सिडको व नवी मुंबई महापालिकेच्या माध्यमातील विविध प्रश्नांचे निवेदन उपमुख्यमंत्री एकनाथ शिंदे यांना सादर केले जाणार असून, सिडकोच्या घरांबाबतीत प्रश्न व इतर समस्यांबाबत उपमुख्यमंत्री संवाद साधला जाणार आहे. मेळाव्यास संबंधित सर्वांनी उपस्थित राहावे, असे आवाहन माथाडी कामगार नेते नरेंद्र पाटील यांनी व इतर पदाधिकाऱ्यांनी केले आहे.