तब्बल ४१ तासांनंतर दुसरा मृतदेह हाती

टिटवाळा, ता. २९ (वार्ताहर) : छटपूजेदरम्यान रायते गावाजवळ सोमवारी सायंकाळी नदीत बुडालेल्या दोन्ही तरुणांचे मृतदेह अखेर सापडले आहेत. राजन विश्वकर्मा (वय १८) याचा मृतदेह मंगळवारी सायंकाळी सापडला होता, तर बेपत्ता असलेला प्रिन्स गुप्ता (वय १६) याचा मृतदेह बुधवारी सकाळी सुमारे १०.३०च्या सुमारास कल्याण येथील गांधारी पुलाजवळ तब्बल ४१ तासांनंतर आढळून आला. या घटनेने रायते गाव व परिसरात हळहळ व्यक्त होत आहे.
घटनेनंतर स्थानिक ग्रामस्थ, टिटवाळा पोलिस आणि अग्निशमन दल घटनास्थळी दाखल झाले. रात्री उशिरापर्यंत शोधकार्य सुरू ठेवण्यात आले; मात्र अंधारामुळे ते थांबवावे लागले. मंगळवारी पहाटेपासून पुन्हा शोधमोहीम सुरू करण्यात आली. ड्रोनचा वापर करून शोधकार्य राबविण्यात आले. मंगळवारी सायंकाळी राजन विश्वकर्मा याचा मृतदेह नदीच्या किनाऱ्याजवळ मिळाला. त्यानंतर बुधवारी सकाळी प्रिन्स गुप्ता याचा मृतदेह कल्याणमधील गांधारी ब्रिज परिसरात सापडला. पोलिसांनी पंचनामा करून मृतदेह उत्तरीय तपासणीसाठी पाठवले. नदीचा वाढलेला प्रवाह आणि खोली यामुळे शोधमोहीम कठीण झाली होती. तरीही पोलिस, अग्निशमन दल, गोताखोर, स्थानिक तरुण आणि स्वयंसेवकांनी अथक प्रयत्न केले. स्थानिक नागरिकांनी प्रशासनाकडे नदीकाठावर कायमस्वरूपी सुरक्षिततेसाठी अडथळे, इशारा फलक आणि बचाव साधनांची व्यवस्था करण्याची मागणी केली आहे.