फ्लोरिडाच्या चित्रपट निर्मात्यांची कल्याण येथील आंबेडकर स्मारकाला भेट
कल्याण, ता. २९ (बातमीदार) : खासदार डॉ. श्रीकांत शिंदे यांच्या प्रयत्नांमुळे उभारण्यात आलेल्या ५-ड प्रभाग येथील डॉ. बाबासाहेब आंबेडकर स्मारकाला अमेरिकेतील फ्लोरिडातील चित्रपट निर्मात्यांनी नुकतीच भेट दिली. डॉ.आंबेडकर यांच्या जीवनावर आधारित आगामी माहितीपटाच्या निर्मितीसाठी आवश्यक माहिती त्यांनी येथे संकलित केली. या भेटीदरम्यान चित्रपट निर्मात्यांनी स्मारकातील विविध विभागांचा आढावा घेत बाबासाहेबांच्या कार्य, विचारसरणी आणि समाज परिवर्तनातील योगदानाबद्दल सखोल माहिती घेतली.
ड प्रभागातील डॉ. बाबासाहेब आंबेडकर स्मारक हे कल्याण शहराच्या पूर्व भागात उभारलेले एक महत्त्वाचे स्मारक आहे. यामध्ये उद्यान, भव्य ग्रंथालय, छायाचित्रांचे दालन, सभागृह आणि आधुनिक सजावट यांचा समावेश आहे. आधुनिक तंत्रज्ञानांचा वापर करून डॉ. बाबासाहेब आंबेडकर यांच्या जीवनप्रवासाचे होलोग्राफीच्या माध्यमातून दर्शन घेण्याची सुविधा देखील उपलब्ध केली आहे. या स्मारकाचे परदेशी पाहुण्यांनी कौतुक केले. या प्रसंगी सामग्री विकास समितीचे अध्यक्ष विजय सुरवाडे, स्मारक समितीचे अध्यक्ष देवचंद अंबादे आणि सचिव सुमेध हुमणे उपस्थित होते.