दोन महिन्यांपासून पाण्याची नासाडी
टिटवाळ्यात अपुरा पाणीपुरवठा; नागरिकांचा संताप
टिटवाळा, ता. ३० (वार्ताहर) : शहरातील पूर्वेकडील वाजपेयी चौक परिसरात जलवाहिनीचा व्हॉल्व्ह फुटल्यामुळे गेल्या दोन महिन्यांपासून हजारो लिटर पाणी दररोज वाया जात आहे. याबाबत नागरिकांनी वारंवार तक्रारी करूनही कल्याण-डोंबिवली महापालिकेच्या जल विभागाने कोणतीही कार्यवाही केली नाही. पाण्याची नासाडी रोखण्यासाठी येथील नागरिक पुन्हा अधिकाऱ्यांकडे गेले असता, जल विभागाचे उपअभियंत्यांनी ‘दोन-तीन दिवस पाऊस थांबवा, मी मग काम करतो’ असे उत्तर दिल्याने स्थानिकांमध्ये संतापाची लाट उसळली आहे.

वाजपेयी चौक परिसरात मागील दोन महिन्यांपासून पाण्याची नासाडी सुरू आहे. पावसाळा संपला तरी परिस्थिती जैसे थेच आहे. रस्त्यावर साचलेल्या सांडपाण्यामुळे डासांची उत्पत्ती वाढली असून, नागरिकांच्या आरोग्यावर थेट परिणाम होत आहे. स्थानिकांनी वारंवार तक्रारी करूनही महापालिका प्रशासनाकडून अद्यापही कोणतीच हालचाल नाही. मागील महिन्यांत याबाबत पर्यटन संरक्षण बहुउद्देशीय संस्थेचे संस्थापक अध्यक्ष गोविंद प्रजापती यांनी लवकरात लवकर या ठिकाणी पाहणी करून कार्यवाही करावी, अशा मागणीचे पत्रदेखील अ प्रभाग क्षेत्र अधिकारी यांना दिले होते; मात्र तरीही या ठिकाणी उपायोजना केली नसल्याने प्रशासनाच्या ढिसाळ कारभारावर टीका करत तत्काळ पाहणी करून दोषींवर कारवाई करण्याची मागणी केली आहे.

दूषित पाण्याने नागरिक हैराण
एकीकडे टिटवाळ्यातील नागरिकांना पाणीटंचाईचा सामना करावा लागत असताना दुसरीकडे नळातून येणारे पाणी गाळयुक्त व दुर्गंधीयुक्त असल्याच्या तक्रारी वाढल्या आहेत. अशा परिस्थितीत पाणी नासाडीचा प्रकार म्हणजे प्रशासनाच्या निष्काळजीचा कळसच म्हणावा लागेल. नागरिकांना स्वच्छ पिण्याचे पाणी मिळावे यासाठी वारंवार मागण्या केल्या जात असल्या तरी जल विभागाचे अधिकारी मात्र हातावर हात धरून बसल्याचे चित्र दिसत आहे.

प्रशासनाच्या निष्क्रियतेवर टीका
पर्यटन संरक्षण बहुउद्देशीय संस्थेचे संस्थापक अध्यक्ष गोविंद प्रजापती यांनी महिनाभरापूर्वीच याबाबत ए प्रभाग क्षेत्र अधिकाऱ्यांना पत्र देऊन तातडीने कार्यवाहीची मागणी केली होती, मात्र प्रशासनाच्या ढिसाळ कारभारावर टीका करत, कोणतीही उपाययोजना झाली नसल्याचे त्यांनी म्हटले आहे.