लोकलमध्ये चढताना फलाटामध्ये तिघे जण अडकले
डोंबिवली स्थानकावरील घटना; जागरूक प्रवाशांचे प्रसंगावधान

सकाळ वृत्तसेवा,
डोंबिवली, ता. ३०: डोंबिवली रेल्वेस्थानकातून जलद लोकल पकडताना एकापाठोपाठ एक अशा तीन प्रवाशांचा तोल जाऊन ते फलाट आणि लोकलच्या गॅपमध्ये अडकल्याची थरारक घटना बुधवारी (ता. २९) सकाळी घडली; मात्र इतर जागरूक प्रवाशांनी वेळीच धाव घेतल्यामुळे मोठा अनर्थ टळला आणि तिन्ही प्रवाशांचे प्राण वाचले.

बुधवारी सकाळी ७ ते ७.३० च्या दरम्यान, डोंबिवली स्थानकाच्या फलाट क्रमांक ५ वर कसाराहून सीएसएमटीकडे जाणारी अतिजलद लोकल पकडताना प्रवाशांची नेहमीप्रमाणे गर्दी झाली होती. लोकलमध्ये चढताना एका प्रवाशाचा पाय दरवाजाच्या पायदानावर घसरला आणि तोल जाऊन तो फलाट व लोकलच्या गॅपमध्ये अडकला. त्याच्या अंगावर आणखी दोन प्रवासी पडले आणि त्यांचेही पाय गॅपमध्ये अडकले. आरडाओरडा होताच तिथे असलेल्या जागरूक प्रवाशांनी प्रसंगावधान राखले आणि तातडीने तिन्ही प्रवाशांना बाहेर खेचले. या घटनेमुळे रेल्वे सुरक्षा दलाचे जवान तत्काळ घटनास्थळी दाखल झाले. प्रवाशांना किरकोळ खरचटले असल्याने त्यांनी वैद्यकीय मदत न घेता पुढील प्रवास सुरू केला. प्रवाशांच्या सतर्कतेमुळे मोठा अपघात टळल्याने रेल्वे प्रशासनानेही त्यांचे कौतुक केले आहे.