लोकल सेवा तासभर ठप्प!
बदलापूर, ता. ३१ (बातमीदार) ः आठवड्याच्या शेवटच्या दिवशी, शुक्रवारी (ता. ३१) सकाळी शेलू ते वांगणी रेल्वेस्थानकांदरम्यान मालगाडीचे इंजिन बंद पडल्याने, कर्जतवरून मुंबईकडे जाणारी रेल्वे वाहतूक सुमारे तासाभरासाठी पूर्णपणे ठप्प झाली होती. सकाळी कामावर जाण्याच्या वेळेत (८.२५च्या सुमारास) वाहतूक थांबल्याने प्रवाशांना मोठा त्रास सहन करावा लागला. यामुळे प्रवाशांमध्ये संतापाचे वातावरण निर्माण झाले.
रेल्वे प्रशासनाने तातडीने दुरुस्तीचे काम हाती घेतले. दुरुस्तीनंतर, जवळपास सकाळी ९.४० वाजता मालगाडी मार्गस्थ झाली आणि लोकल सेवा सकाळी ९.४५ वाजता पूर्वपदावर आली. या बिघाडामुळे चाकरमान्यांचे हाल झाले, तसेच दुपारपर्यंत लोकल सेवा २० ते २५ मिनिटे उशिराने धावत होत्या.