अर्नाळा समुद्रात अडकलेली बोट किनाऱ्यावर सुखरूप
पालघर, ता. ३१ ः मुंबई येथील ‘आई तुळजाभवानी’ (आयएनडी-एमएच-७-एमएम-३५२३) ही मासेमारी बोट अर्नाळा समुद्रासमोर नऊ खलाशांसह शुक्रवारी (ता. ३१) अडकली होती. त्या बोटीला स्थानिक मच्छीमार, तटरक्षक दल, मत्स्यव्यवसाय विभागाच्या मदतीने किनाऱ्यावर सुखरूप आणण्यात आले. बोटीवरील मच्छीमार खलाशीसुद्धा सुखरूप आहेत.
समुद्रात मासेमारीसाठी जात असताना ११ सागरी मैलांवर बोटीचे इंजिन अचानक बंद पडल्यामुळे ती भरकटली होती. खवळलेला समुद्र, उंच लाटा आणि वादळी वाऱ्यामुळे बोटीला धोका निर्माण झाला होता. बोटीने मदतीसाठी धावा केल्यानंतर स्थानिक मच्छीमार (अर्नाळा मच्छीमार संस्था), तटरक्षक दल आणि मत्स्यव्यवसाय विभाग यांनी तातडीने बचावकार्य सुरू केले. अर्नाळ्यातील ‘नमो मारिया’ बोट आणि मत्स्यव्यवसाय विभागाची ‘जय जीवदानी’ गस्ती नौका मदतीसाठी समुद्रात गेली. बचावकार्यातील अडथळ्यांनंतर तटरक्षक दलाने बोट अर्ध्यावर आणली आणि त्यानंतर ‘नमो मारिया’ बोटीने तिला सुखरूप किनाऱ्यावर आणले. बोटीवरील सर्व नऊ खलाशी सुखरूप असल्याची माहिती मत्स्यव्यवसाय विभागाने दिली आहे.