हरिहरेश्वरच्या रक्षणकर्त्यांचे स्मरण
कार्तिकी एकादशीनिमित्त ‘कोस प्रदक्षिणा’ पूर्ण
श्रीवर्धन, ता.३ (वार्ताहर)ः श्री क्षेत्र हरिहरेश्वर येथील कार्तिकी उत्सवास नवान्न पौर्णिमेस प्रारंभ झाला आहे. त्रिपुरारी पौर्णिमेपर्यंत म्हणजे साधारण महिनाभर हा उत्सव सुरू असतो. यावेळी कालभैरव, योगेश्वरी देवीची पालखी काढण्यात येते.
कार्तिकी एकादशी दिवशी हरिहरेश्वराचे राज्य कसे चालू आहे, हे पाहण्याकरिता रक्षणकर्ते कालभैरव, योगेश्वरी माता पालखीत विराजमान होऊन गावात फिरतात. पर्वत रूपी पार्वती, महेश, विष्णू आणि ब्रम्ह पर्वतांना प्रदक्षिणा घातली जाते. काळेश्री मातेला भेटून ही पालखी पुन्हा मंदिर परिसरात परत येते. या प्रदक्षिणेला ‘कोस प्रदक्षिणा’ असे देखील म्हणतात. या प्रदक्षिणा दरम्यान विविध तीर्थस्थान असून स्वर्गाद्वार येथून श्रींची पालखी येते. पालखी विष्णूपद येथे विसावा घेतात. त्यानंतर पुन्हा मंदिराकडे मार्गक्रमण करतात. या प्रदक्षिणेसाठी शेकडो भाविक हरिहरेश्वरमध्ये दाखल होतात.