सानपाड्यात २२ लाखांची घरफोडी

नवी मुंबई, ता. ३ (वार्ताहर) : दिवाळीच्या सुट्टीत मूळ गावी तसेच देवदर्शनासाठी गेलेल्या कुटुंबाचे बंद घर अज्ञात चोरट्यांनी फोडल्याची घटना समोर आली आहे. यामध्ये चोरट्यांनी रोख रकमेसह वेगवेगळ्या प्रकारचे दागिने असा तब्बल २२ लाख ५५ हजार रुपये किमतीचा ऐवज चोरून नेल्याची घटना उघडकीस आली आहे. सानपाडा पोलिसांनी याप्रकरणी गुन्हा दाखल करून सीसीटीव्ही फुटेजच्या माध्यमातून तपासाला सुरुवात केली आहे.
श्रद्धा भास्कर (वय २९) हिचे आई-वडील सानपाडा सेक्टर-४ मधील ड्रिमलँड सोसायटीत राहण्यास आहेत. लक्ष्मीपूजन असल्याने श्रद्धाचे आई-वडील आपल्या मूळ गावी गेले होते. त्यानंतर २९ ऑक्टोबर रोजी श्रद्धा हिने सानपाडा येथील घरी जाऊन घरात सर्व व्यवस्थित असल्याची खात्री करून पुन्हा घराला टाळे लावले, मात्र त्यानंतर चोरट्यांनी संधी साधून रविवारी (ता. २) पहाटेच्या सुमारास बंद घराचे टाळे तोडून त्यांच्या घरातील दीड लाख रुपयांची रोख रक्कम तसेच वेगवेगळ्या प्रकारचे २२ तोळे वजनाचे दागिने असा तब्बल २२ लाख ५५ हजार रुपये किमतीचा ऐवज लंपास केला. या घरफोडीदरम्यान चोरट्यांनी शेजाऱ्यांच्या घराला बाहेरून कडी लावल्याचे घडकीस आले आहे. शेजाऱ्यांनी सकाळी बाहेरील व्यक्तीच्या मदतीने बाहेरची कडी उघडली. त्यांनतर हा प्रकार उघडकीस आला. याप्रकरणी श्रद्धाच्या तक्रारीनंतर पोलिसांनी गुन्हा दाखल करून तपास सुरू केला आहे.