बालकलाकारांच्या अभिनयाला दाद
नवी मुंबईतील बालनाट्य कार्यशाळेचा समारोप
तुर्भे, ता. ४ (बातमीदार) ः नवी मुंबई बालारंगभूमी, संत शिरोमणी कलामंच यांच्या संयुक्त विद्यमाने बालनाट्य अभिनय कार्यशाळा घेण्यात आली. या शिबिरात सहभागी ४२ विद्यार्थ्यांनी सादर केलेल्या अभिनयाला प्रेक्षकांनी भरभरून दाद दिली.
मराठी भाषेला अभिजात दर्जा मिळाल्याचा धागा पकडून अतिदुर्गम भागात मराठी भाषा पोहोचविण्यासाठी ‘माय मराठीचे’ अप्रतिम सादरीकरण करण्यात आले. तर ‘शूटिंग शूटिंग’ बालनाट्यातून एखादी कला विकत घेता येत नाही, ती उपजत असावी लागते, असा आशय असणारी बालनाटिका सादर केली गेली. तर ‘सावधान’मधून लहान मुले आणि मोबाईलच्या वाढत्या प्रभावावर प्रकाश टाकण्यात आला. या वेळी डॉ. नंदकिशोर जोशी यांनी गेली २९ वर्षे श्रीहरी पवळे यांनी विविध अडचणींवर मात करत बालनाट्य कार्यशाळेचा उपक्रम सतत सुरू ठेवल्याचे कौतुक केले. तसेच नवी मुंबईच्या इतिहासात या उपक्रमाची नोंद घेतली जाईल, असे सांगितले. याप्रसंगी शिबिरार्थींना प्रमाणपत्र देऊन त्यांचा गौरव करण्यात आला.