खारघरचा उल्लेख खारखर
सिडको जाहिरातीत नावातील बदलावरून आक्षेप
खारघर, ता. ४ (बातमीदार) ः सिडकोकडून खारघर क्षेत्रातील पाणीपुरवठा, इलेक्ट्रिक खंदकाच्या कामासंदर्भात एक जाहिरात प्रसिद्ध करण्यात आली आहे. या जाहिरातीत खारघरऐवजी ‘खारखर’ असा उल्लेख आहे. त्यामुळे ठेकेदाराच्या हितासाठी बदल केल्याचा आक्षेप घेतला जात आहे. सिडकोच्या वाशी व केएचआर अधीक्षक अभियंता विभागाकडून नवी मुंबईतील खारघर क्षेत्र सेक्टर एक ते पंचेचाळीसमध्ये पाणीपुरवठा, इलेक्ट्रिक (पीएसआयडीसी) खंदकांचे पुनःस्थापना कामासाठी एक वर्षासाठी एक कोटीहून अधिक रकमेच्या निविदा मागविली आहेत. विशेष म्हणजे, या जाहिरातीत खारघरऐवजी ‘खारखर’ असा उल्लेख करण्यात आला आहे. या प्रकारामुळे अधीक्षक अभियंता डोळे झाकून स्वाक्षरी करत असल्याचा प्रश्न उपस्थित होत आहे. तसेच अधिकाऱ्यावर कारवाई करावी, अशी मागणी केली जात आहे. यासंदर्भात विद्युत विभागात संपर्क होऊ शकला नाही.