भिवंडी, ता. ४ (वार्ताहर) ः क्षुल्लक वादातून भावा-बहिणीत वाद होऊन भांडण झाले होते. त्यांचे भांडण सोडवण्यासाठी गेलेल्या बापाला मुलानेच शिवीगाळ करीत बेदम मारहाण केल्याची धक्कादायक घटना कामतघर परिसरातील ब्रम्हानंदनगरमध्ये समोर आली आहे. याप्रकरणी वडिलांच्या फिर्यादीवरून मुलाविरोधात नारपोली पोलिस ठाण्यात गुन्हा दाखल करण्यात आला आहे. रोहित जैस्वाल (वय २५) मुलाचे नाव आहे.

पोलिसांनी दिलेल्या माहितीनुसार, कामतघर येथील ब्रम्हानंदनगरमधील गणेश अपार्टमेंटमध्ये तळमजल्यावर अनंतराम रामचंद्र जैस्वाल (वय ४५) यांचे कुटुंब राहते. त्यांचा मुलगा रोहित आणि मुलगी गौरी यांच्यात क्षुल्लक वादातून सोमवारी (ता. ३) भांडण झाले होते. त्यांचा वाद सोडवण्यासाठी अनंतराम गेले असता रोहितला या गोष्टीचा राग आला. त्याने वडिलांना शिवीगाळ करून हातातील लोखंडी कड्याने मारून रक्तबंबाळ करून जखमी केले.