स्लॅब कोसळल्याने दोन मुले किरकोळ जखमी
सकाळ वृत्तसेवा
ठाणे, ता. ३ ः मुंब्रा, वफा पार्क, अल्मास कॉलनी येथील सुमारे २५ ते ३० वर्षे जुन्या ‘एम विंग’ इमारतीमध्ये सोमवारी (ता. ३) रात्री सव्वानऊ ते साडेनऊच्या सुमारास स्लॅब कोसळण्याची घटना घडली. इमारतीच्या सहाव्या मजल्यावरील रूम नं. ६०४चा स्लॅब कोसळल्याने मुझ्झमिर बुशरा मामुन रशीद (वय १३) आणि मुदसिर बुशरा मामुन राशिद (७) ही दोन अल्पवयीन मुले किरकोळ जखमी झाली. त्यांना छत्रपती शिवाजी महाराज रुग्णालयात दाखल करण्यात आले आहे. तसेच सातव्या मजल्यावरील रूम नं. ७०४ची फ्लोरिंग कोसळून परवीन मिमली (५९) या वृद्ध महिला अडकल्या होत्या. त्यांना ठाणे महापालिका अग्निशमन दलाच्या जवानांनी सुखरूप बाहेर काढले. घटनेनंतर सदनिकांचा उर्वरित भाग धोकादायक असल्याने त्या रिकाम्या करून धोकापट्टी बांधण्यात आली आहे. रहिवाशांना तात्पुरत्या स्वरूपात नातेवाइकांकडे राहण्याचे निर्देश देण्यात आले आहेत.