तुर्भे नाका येथे दारूच्या नशेत मित्राची हत्या
नवी मुंबई, ता. ४ (वार्ताहर) : नवी मुंबईतील तुर्भे नाका परिसरात सोमवारी (ता. ३) रात्री दारूच्या नशेत झालेल्या शुल्लक वादातून तीन मित्रांनी मिळून आपल्याच सहकाऱ्याची हत्या केली. मित्राची हत्या केल्यानंतर तिघे मारेकरी फरार झाले असून, तुर्भे पोलिस त्यांचा शोध घेत आहेत.
तुर्भे नाका येथील ठाणे-बेलापूर मार्गावरील ओव्हर ब्रिजखाली दारू पीत असताना पंडित उर्फ आनंद कोरी (वय ४३) याने शिवीगाळ केल्याने चौघांमध्ये भांडण झाले. रागाच्या भरात आर्यन, राजकुमार आणि विकी या त्याच्या मित्रांनी पंडितवर फायबर पाइप आणि बिअरच्या बाटलीने अमानुष हल्ला केला. या मारहाणीत गंभीर जखमी झालेल्या पंडितला रुग्णालयात मृत घोषित करण्यात आले. हत्या केल्यानंतर तिन्ही आरोपी फरार झाले आहेत. तुर्भे पोलिसांनी आरोपींविरुद्ध हत्येचा गुन्हा दाखल केला असून, त्यांच्या शोधासाठी पथके तयार केली आहेत. लवकरच आरोपींना अटक केली जाईल, अशी माहिती पोलिसांनी दिली आहे.