भारतीय बनावटीचे १.०५ कोटींचे विदेशी मद्य जप्त
राज्य उत्पादन शुल्क विभागाची मोठी कारवाई; दोघांना अटक!
ठाणे शहर, ता. ४ (बातमीदार) : राज्य उत्पादन शुल्क विभागाने ठाणे येथे मोठी कारवाई करत एक कोटी पाच लाख ६० हजार रुपये किमतीचे परराज्यातील (गोवानिर्मित) भारतीय बनावटीचे विदेशी मद्य जप्त केले आहे. पनवेल-मुंब्रा मार्गावर मंगळवारी (ता. ४) सकाळी साडेनऊ वाजण्याच्या सुमारास सापळा रचून ही कारवाई करण्यात आली असून, याप्रकरणी दोन आरोपींना अटक करण्यात आली आहे.
पनवेल-मुंब्रा रोडवर राज्य उत्पादन शुल्क विभागाच्या अधिकाऱ्यांनी आयशर कंपनीचा टेम्पो अडवून तपासला असता, त्यामध्ये मद्याच्या एक हजार पेट्या आढळून आल्या. हा साठा ठाणे, मुंबई आणि इतर परिसरात विक्रीसाठी वितरित केला जाणार होता, ज्यामुळे राज्याच्या कराची फसवणूक होणार होती. अधिकाऱ्यांनी मद्यासह टेम्पो जप्त केला असून, त्याची एकूण किंमत एक कोटी ३१ लाख ५२ हजार रुपये आहे. याप्रकरणी चालक मोहम्मद समशाद सलमानी आणि देवेंद्र खुमाराम मेघवाल या दोघांना अटक करण्यात आली आहे. ठाणे राज्य उत्पादन शुल्क विभागाचे अधीक्षक प्रवीण तांबे यांच्या मार्गदर्शनाखाली डोंबिवली विभागाने ही कारवाई केली.