४२ प्रभागांमध्ये आज ‘वॉकेथॉन’
खासदार क्रीडा महोत्सवाला नागरिकांचा उत्स्फूर्त प्रतिसाद

मुंबई, ता. ४ ः उत्तर मुंबईचे खासदार आणि केंद्रीय मंत्री पीयूष गोयल यांच्या संकल्पनेतून सुरू झालेल्या ‘खासदार क्रीडा महोत्सव २०२५’ या उपक्रमाला नागरिकांकडून उत्स्फूर्त प्रतिसाद मिळत आहे. बुधवारी (ता. ५) आयोजित वॉकेथॉनमध्ये उत्तर मुंबईतील सर्व ४२ प्रभागांमधील २०,००० हून अधिक नागरिक सहभागी होणार आहेत. ही बहुप्रतीक्षित वॉकेथॉन एक जनआंदोलनासारखी फिटनेस चळवळ ठरणार असून, आरोग्य, एकता आणि सामुदायिक भावनेचे प्रतीक बनणार आहे, अशी माहिती आयोजकांनी दिली.

वॉकेथॉनची नोंदणी सुरू असून, नागरिकांना ठिकाणीच ‘ऑन द स्पॉट’ नोंदणी करून सहभाग घेण्याचीही सुविधा देण्यात आली आहे. खासदार गोयल यांनी सर्व नागरिकांना विशेषतः ज्येष्ठ नागरिक, महिला आणि मुलांना मोठ्या संख्येने सहभागी होण्याचे आवाहन केले आहे. ‘दररोज चालूया, निरोगी राहूया’ हा संदेश देणाऱ्या या उपक्रमाचे उद्दिष्ट तरुण, महिला आणि ज्येष्ठ नागरिकांना एकत्र आणणे आणि सामूहिक फिटनेस संस्कृती विकसित करणे हे आहे. दोन ते तीन किमी अंतराच्या या सामुदायिक वॉकेथॉनद्वारे नागरिकांना केवळ उद्यानापुरते मर्यादित न राहता आपल्या परिसरात सक्रिय राहण्याची प्रेरणा दिली जाणार असल्याचे या वेळी सांगण्यात आले. दरम्यान, वॉकेथॉनमध्ये सहभागी होणाऱ्या प्रत्येक नागरिकाला फिटनेस आणि सामुदायिक सहभागाचे प्रतीक म्हणून प्रमाणपत्र देण्यात येणार आहे. खासदार क्रीडा महोत्सवामुळे उत्तर मुंबईत उत्साहाची लाट उसळली असून, खेळ आणि फिटनेस या माध्यमातून एक सशक्त, निरोगी आणि एकजुटीने बांधलेले समाजाचे दर्शन घडत असल्याचे आयोजकांनी सांगितले.