थांग-ता राष्ट्रीय स्पर्धेमध्ये ठाणे जिल्हा अग्रेसर
कल्याण, ता. ५ (वार्ताहर) : गोवा येथे ३१ वी राष्ट्रीय थांग-ता स्पर्धा आयोजित करण्यात आली होती. या स्पर्धेसाठी देशातील सर्व राज्यांतून विद्यार्थ्यांनी सहभाग घेतला. या स्पर्धेत विविध वजनी गटात ठाण्याच्या विद्यार्थ्यांनी पदकांची लयलूट केली आहे.
थांग-ता हा मणिपूरमधील पारंपारिक मर्दानी खेळ आहे. थांग-ता फेडरेशन ऑफ इंडियाच्या माध्यमातून २८ ते ३० ऑक्टोबर यादरम्यान या स्पर्धा गोव्यात घेण्यात आल्या. या स्पर्धेत ठाणे जिल्ह्यातून कल्याण, डोंबिवली, ठाणे शहर, भिवंडी, टिटवाळा येथील नऊ खेळाडू सहभागी झाले होते. यामध्ये कार्तिक चव्हाणने सुवर्णपदक, झुफा अन्सारी व कनिष्क गुंजाळ यांनी रौप्यपदक पटकावले आहे. अमन ढोकळे, आझान अन्सारी, समर्थ घुरघुरे, भार्गवी कुडव, हितांशी पटेल, कवीश पाटील या खेळाडूंना ऑल ठाणे डिस्ट्रिक्ट थांग-ता स्पोर्ट्स असोसिएशनचे अध्यक्ष जगन्नाथ शिंदे, उपाध्यक्ष अंकुर आहेर, सचिव गिरीश वाघमारे, खजिनदार संजय पवार, सहकार्यवाह उमेश परब, प्रशिक्षक डॉ. जाॅय, मोमीन या प्रशिक्षकांचे मार्गदर्शन लाभले. ठाणे जिल्ह्यातील खेळाडूंनी प्राप्त केलेल्या यशाबद्दल जगन्नाथ शिंदे यांनी प्रशिक्षक व खेळाडूंचे कौतुक केले.