मुंबई बाजार समितीमध्ये सचिवांवर शिस्तभंगाची मागणी
जुईनगर, ता. ५ (बातमीदार) ः मुंबई कृषी उत्पन्न बाजार समितीच्या (एपीएमसी) संचालक मंडळाच्या ३१ ऑक्टोबरच्या बैठकीत नव्याने रुजू झालेले सचिव शरद जरे गैरहजर राहिल्याने मोठा गदारोळ झाला. काही संचालकांनी संताप व्यक्त करत थेट शिस्तभंग कार्यवाही ठराव मंजूर करा, अशी मागणी केली. जरे यांनी सचिवपदाची जबाबदारी स्वीकारून अवघे २४ तास झाले असतानाच ते बैठकीला अनुपस्थित होते. ते पुण्यात पणन संचालकांच्या बैठकीसाठी उपस्थित असल्याने त्यांनी तसे लेखी कळवले होते आणि त्यांच्याऐवजी सहसचिव महेश साळुंके पाटील उपस्थित राहणार असल्याचेही सांगितले होते. तरीही जरे यांच्याविरोधात शिस्तभंगाचा ठराव मंजूर करण्याची मागणी करण्यात आल्याने आश्चर्य व्यक्त करण्यात येत आहे.
या घटनेमुळे बाजारात विविध चर्चांना उधाण आले आहे. काही संचालकांनी तर ‘आम्हाला हे सचिव नकोत, त्यांना परत पाठवा,’ अशी थेट मागणी केल्याचे समजते. हा सर्व प्रकार बाजार समितीतील अंतर्गत सत्तासंघर्षाचा परिणाम असून त्याचा फटका बाजार घटकांना बसत असल्याचे बोलले जात आहे. बाजार समितीच्या निवडणुकीसाठी न्यायालयाने त्वरित आदेश देऊनही कार्यवाही होत नसल्याने काही सचिवांनी नाराजी व्यक्त केली होती, ज्यामुळे काही संचालकांनी ही भूमिका घेतल्याचे खासगीत सांगण्यात येत आहे.