नवी मुंबईत वाढली डासांची भुणभुण
हिवताप व डेंगीचा धोका; विशेष धूरफवारणी मोहीम सुरू
तुर्भे, ता. ९ (बातमीदार) ः नवी मुंबईत सध्या डासांची भुणभुण मोठ्या प्रमाणात वाढली असून नागरिक त्रस्त झाले आहेत. लांबलेला पाऊस आणि मधूनमधून पडणारे ऊन अशा विचित्र हवामानामुळे डासांच्या प्रचंड पैदाशीला पोषक वातावरण निर्माण झाले आहे. परिणामी, हिवताप, डेंगी, चिकुनगुनिया यांसारख्या रोगांचा धोका वाढला असून महापालिकेकडे तक्रारींचा ओघ सुरू झाला आहे. या पार्श्वभूमीवर महापालिकेने विशेष धुरीकरण मोहीम हाती घेतली आहे.
संध्याकाळ होताच डासांचा त्रास अधिक वाढतो. नागरिकांना चावे घेत डास अक्षरशः हैराण करत आहेत. या समस्येवर नियंत्रण मिळवण्यासाठी नवी मुंबई महापालिकेच्या आरोग्य विभागाने साप्ताहिक नियोजनानुसार सकाळ-संध्याकाळ अळीनाशक फवारणी आणि रासायनिक धुरीकरण सुरू केले आहे. विशेषतः खाडीकाठचा आणि दलदलीचा भाग हिवाळ्यात डासांच्या प्रादुर्भावासाठी अनुकूल ठरतो. त्यामुळे या काळात नियमित धुरीकरणासोबतच अतिरिक्त सायंकालीन मोहीम हाती घेण्यात आली आहे. महापालिका आयुक्त डॉ. कैलास शिंदे यांच्या मार्गदर्शनाखाली ही विशेष मोहीम नोव्हेंबरपासून ते फेब्रुवारीपर्यंत राबवली जाणार आहे. सकाळच्या वेळी गटारांमध्ये अळीनाशक फवारणी केली जाते, तर सायंकाळी गावठाण, झोपडपट्टी, सोसायट्यांमधील मीटर रूम, जिने इत्यादी ठिकाणी रासायनिक धुरीकरण केले जाते.