धर्मस्वातंत्र्य विधेयकाविरोधात शांततापूर्ण निदर्शने
मालाड, ता. ९ (बातमीदार) : गोरेगाव पश्चिम येथील आवर लेडी ऑफ द रोजरी चर्च बाहेर आज सकाळी फ्रीडम ऑफ रिलिजन बिल अर्थात धर्मस्वातंत्र्य विधेयकाच्या विरोधात शांततापूर्ण निदर्शने करण्यात आली. या निदर्शनात बॉम्बे कॅथोलिक सभेच्या आवर लेडी ऑफ द रोजरी युनिटच्या पॅ रिशनर्स व सदस्यांनी मोठ्या संख्येने सहभाग घेतला. महाराष्ट्रातील भाजप नेतृत्वाखालील महायुती सरकारकडून येत्या हिवाळी अधिवेशनात हे विधेयक सादर होण्याची शक्यता व्यक्त होत असल्याने निदर्शकांनी आपला निषेध नोंदविला. या आंदोलनात विविध क्षेत्रांतील नागरिकांनीही ख्रिस्ती समाजाच्या एकात्मतेसाठी सहभाग घेतला. यामध्ये प्रख्यात नागरी व मानवाधिकार कार्यकर्ते प्रा.अरविंद निगळे, नामवंत गांधीवादी जयंत दिवाण, राष्ट्र सेवा दल महाराष्ट्र संयोजक उमेश कदम, सेव्ह आरे फॉरेस्ट व प्राणी हक्क कार्यकर्ते मनन देसाई, जमात-ए-इस्लामी गोरेगावचे संयोजक अबू शेख, नीडा (NEEDA) चे राष्ट्रीय संयोजक डॉ. कुतुब किदवई, स्वाधार गोरेगावच्या मंगला मराठे, बीसीएस अध्यक्ष नॉर्बर्ट मेंडोंसा आणि संविधान जागर समिती, गोरेगावचे इक्बाल शेख यांचा विशेष सहभाग होता.
या निदर्शनाचे आयोजन नायजेल वास, मानद सचिव, आवर लेडी ऑफ द रोजरी युनिट यांनी केले.