बिबट्याचे दर्शनाने तरुणांची भंबेरी
शेलू-मोहिली-अवसारे रस्त्यावरील प्रकार
कर्जत, ता.१० (बातमीदार)ः तालुक्यातील शेलू येथून अवसारे-मोहिली गावांना जोडणाऱ्या रस्त्यावर रविवारी रात्री दुचाकीवरून जाणाऱ्या तरुणांना गावाकडे परतत असताना मोहिली जवळ बिबट्या दिसला होता. या प्रकाराने परिसरात एकच खळबळ उडाली आहे.
मानिवली येथील काही तरुण रविवारी (ता.९) रात्री अंदाजे ९ च्या सुमारास शेलूहून निघाले होते. याचवेळी अवसारे-मोहिली गावांना जोडणाऱ्या रस्त्यावर बिबट्या दिसून आला. या बाबतची माहिती तातडीने स्थानिक ग्रामस्थांनी वनविभागाला दिली. माहिती मिळताच वनविभागाचे अधिकारी आणि कर्मचारी घटनास्थळी दाखल झाले. अवसारे, निकोप, मोहिली आणि मानिवली परिसरात रात्रीची पाहणी करण्यात आली. या पाहणीदरम्यान बिबट्याचे पायांचे ठसे वनकर्मचाऱ्यांना आढळून आले. त्यामुळे वनविभागाने ग्रामस्थांना सतर्क राहण्याच्या सूचना दिल्या आहेत.
-----------------------------------
रात्रीचा प्रवास धोक्याचा
या रस्त्यावर रविवारी (ता.२) रात्री पट्टेदार वाघासारखा प्राणी दिसल्याची चर्चा रंगली होती. अशातच आता प्रत्यक्ष बिबट्याचे दर्शन झाल्याने भीतीचे वातावरण निर्माण झाले आहे. त्यामुळे परिसरातून रात्रीच्या वेळी प्रवास करताना विशेष काळजी घ्यावी, असे आवाहन वनविभागाने केले आहे.