कासा, ता. १० (बातमीदार) : मुंबई-अहमदाबाद महामार्गावर दापचरी जकात नाका येथे रविवारी (ता. ९) सायंकाळी साडेसात वाजण्याच्या सुमारास गुजरातहून मुंबईकडे जात असलेल्या कारला अचानक आग लागल्याची घटना घडली. एमएच ४८ एजे ५५०७ या कारमधून अचानक धूर निघताना दिसल्याने मागील वाहनचालकांनी चालकाला गाडी थांबविण्याचा इशारा दिला. चालकाने तत्काळ गाडी रस्त्याच्या कडेला थांबवून सर्व प्रवाशांना बाहेर उतरवले. काही क्षणांतच गाडीने पेट घेतला. सुदैवाने वाहनात प्रवास करणारे सहा जण व एक लहान मूल सर्वजण सुरक्षित आहेत, मात्र कोणतीही जीवितहानी झाली नाही. या घटनेची माहिती मिळताच डहाणू अग्निशमन दल घटनास्थळी दाखल झाले व आग आटोक्यात आणली.