ठाणे जिल्हा स्तरावरील बॅडमिंटन स्पर्धेचे यशस्वी आयोजन
कल्याण, ता. १० (वार्ताहर) : इनर व्हील क्लब ऑफ कल्याण यांच्या वतीने ८ व ९ नोव्हेंबर रोजी ठाणे जिल्हा स्तरावरील बॅडमिंटन स्पर्धेचे आयोजन करण्यात आले होते. या स्पर्धेचे उद्‍घाटन माजी नगरसेवक वरुण पाटील यांच्या हस्ते करण्यात आले. याप्रसंगी कल्याण भाजप मंडळ अध्यक्ष रितेश फडके, भाजप पदाधिकारी सुधीर वायले, समृद्ध ताडमारे, भगवान म्हात्रे आदी मान्यवर उपस्थित होते. स्पर्धेदरम्यान आमदार नरेंद्र पवार यांनीही भेट देऊन खेळाडूंना प्रोत्साहनपर विचारांनी प्रेरित केले आणि त्यांचा उत्साह वाढविला.
स्पर्धेचे संचालन मुख्य पंच सौरभ प्रधान यांच्या कुशल मार्गदर्शनाखाली करण्यात आले. ठाणे जिल्ह्यातील विविध भागांतील नवोदित आणि अनुभवी खेळाडूंनी सहभाग नोंदविला. विजेत्यांना पारितोषिक वितरण इनर व्हील जिल्हा अध्यक्षा लक्ष्मी सिंह यांच्या हस्ते पार पडले. या स्पर्धेचे यशस्वी आयोजन क्लब अध्यक्षा दिप्ती दिवाडकर, सचिव ॲड. सुशमा पटेल व प्रोजेक्ट चेअरमन ॲड. निता कदम यांच्या नेतृत्वाखाली इनर व्हील क्लब ऑफ कल्याणच्या सर्व सहकारी सदस्यांच्या अथक प्रयत्नांमुळे शक्य झाले.