महिला टोळीने सोनाराला लुबाडले
१८ कॅरेट सोन्याचे ६५ नग घेऊन पोबारा
सकाळ वृत्तसेवा
ठाणे, ता. १० : सोन्याच्या नाकातील पिना खरेदी करण्याच्या बहाण्याने दुकानात आलेल्या तीन महिलांनी सोनाराला गंडा घातल्याचा प्रकार समोर आला आहे. त्या महिलांनी हातचलाखीने एक लाख दोन हजार रुपये किंमतीचे १०.२०० ग्रॅम वजनाचे १८ कॅरेट सोन्याचे ६५ नग घेऊन पोबारा केला आहे. याप्रकरणी नौपाडा पोलिस ठाण्यात त्या महिलांविरोधात गुन्हा दाखल झाला आहे.
तक्रारदार रवींद्र सरफळे (वय ५०) यांचे खोपट, हंसनगर येथे श्री शिव समर्थ ज्वेलर्स नावाचे दुकान आहे. १ नोव्हेंबर रोजी ६० ते ६५ वर्षीय तीन महिला कानातील चमकी विकत घेण्यासाठी आल्या होत्या. त्याचवेळी त्यांना सोन्याच्या पीना दाखवत असताना त्यांनी गोंधळ घातला. पिनाचे पाकीट उचलून हातात घेत होत्या. त्या महिलांनी हातचलाखीने सोन्याच्या पिनांची पाकीटे नकळत त्यांच्या साडीमध्ये लपवत पोबारा केला. रवींद्र सरफळे हे त्यांच्या दुकानातील स्टॉक चेक करित असताना त्यांना १०.२०० ग्रॅम वजनाचे १८ कॅरेट सोन्याचे ६५ नगाचे पाकीट मिळून आले नाही. म्हणून त्यांनी दुकानातील सीसीटीव्हीची पाहणी केल्यावर हा प्रकार समोर आला. याप्रकरणी त्यांनी रविवारी (ता. ९) पोलिस ठाण्यात धाव घेत झालेल्या चोरीप्रकरणी तक्रार दिल्यानंतर त्या तीन महिलांविरोधात गुन्हा दाखल झाला आहे. नौपाडा पोलिस ठाण्याचे वरीष्ठ पोलिस निरीक्षक अभय महाजन यांच्या मार्गदर्शनाखाली तपास सुरू आहे.