न्यू हायस्कूल व जुनिअर कॉलेजचा सुवर्ण महोत्सव वर्षाला सुरवात
कल्याण (वार्ताहर) : जनरल एज्युकेशन इन्स्टिट्यूट दादर यांच्या न्यू हायस्कूल व ज्युनिअर कॉलेजच्या सुवर्ण महोत्सवी सोहळा रविवारी (ता. ९) महाविद्यालयाच्या प्रांगणात पार पडला. या कार्यक्रमाचे अध्यक्ष माजी आमदार आणि माजी विद्यार्थी जगन्नाथ शिंदे यांच्या व इतर मान्यवरांच्या हस्ते ग्रंथालय स्पोर्ट्स रूम आणि सोलार प्रोजेक्टचे उद्‍घाटन करण्यात आले. यानंतर सुवर्ण महोत्सवी बॅनरचे अनावरण आणि दीपप्रज्वलन झाले.
या कार्यक्रमाचे प्रमुख पाहुणे मिलिंद बागडे यांनी शाळेने दिलेल्या संस्कारांबद्दल कृतज्ञता व्यक्त केली. जनरल एज्युकेशन इन्स्टिट्यूटचे उपाध्यक्ष मिलिंद कुलकर्णी व कार्याध्यक्ष शैलेंद्र साळवी यांनी संस्थेच्या परंपरा, मूल्य आणि प्रगतीचे महत्त्व अधोरेखित केले. अध्यक्षीय भाषणात जगन्नाथ शिंदे यांनी शाळेच्या प्रगतीचा गौरव करत १५ लाख रुपयांची देणगी जाहीर केली. या कार्यक्रमासाठी कार्यवाहक विकास पाटील, उपकार्यवाह महेश केळकर, संचालक मंडळ सदस्य राधाकृष्ण पाठक, संचालक मंडळ सदस्य राजपूत, शिंगाणे, सुनील पाटील, शेडगे, वैशाली पाटील, राऊत आदी उपस्थित होते.