बिल देण्यावरून हल्ला
ठाणे : उपवन तलावाजवळ बारमध्ये दारू पिऊन झाल्यावर बिल देण्याच्या कारणावरून तक्रारदार विकास मगरे यांच्यावर दोन ते तीन इसमांनी विनाकारण शिवीगाळ करून हल्ला केला. या हल्ल्यात तक्रारदार जखमी झाला असून, हा प्रकार रविवारी (ता. ९) रात्री घडला. याप्रकरणी वर्तकनगर पोलिस ठाण्यात हल्ला करणाऱ्यांविरोधात गुन्हा दाखल करण्यात आला आहे.
..............
बेल्ड हल्ला
ठाणे : खर्चाला पैसे न दिल्याचा राग मनात धरून मुंब्र्यातील बिगारी असलेल्या संतोष खेडेकर (५२) यांच्यावर इम्तियाज शेख (३५) या तरुणाने बेल्टने डोक्यावर हल्ला केला. हा प्रकार शनिवारी (ता. ८) रात्री घडला. हल्लेखोर हा तक्रारदारांच्या ओळखीचा असून तो मुंब्रा, अचानकनगर येथे राहणारा आहे. याप्रकरणी मुंब्रा पोलिस ठाण्यात गुन्हा दाखल झाला आहे.
......
अल्पवयीन मुलगी बेपत्ता
ठाणे : दुकानावर जाऊन येते, अशी सांगून गेलेली १७ वर्षीय अल्पवयीन मुलगी घरी परतली नाही. ही मुलगी रविवारी (ता. ९) दुपारी १ वाजता बाहेर गेली. तिला कोणीतरी फूस लावून नेल्याप्रकरणी मुंब्रा पोलिस ठाण्यात अपहरणाचा गुन्हा दाखल झाला आहे.
......
वाहनचोरी
ठाणे : मुंब्रा, मित्तल ग्राउंडवर पार्क केलेली ८० हजार रुपयांची दुचाकी चोरीला गेली आहे. १६ ऑक्टोबरला पार्क केलेली दुचाकी चोरीला गेल्यानंतर मिळून न आल्याने सैफअली मुरादअली शेख (२४) यांनी मुंब्रा पोलिस ठाण्यात सोमवारी धाव घेत तक्रार दिली. याप्रकरणी मुंब्रा पोलिस पुढील तपास करीत आहेत.
............