मुंबई महापालिका निवडणुकीसाठी
प्रभाग आरक्षण सोडत जाहीर
सकाळ वृत्तसेवा
मुंबई, ता. ११ ः सर्वोच्च न्यायालयाच्या निर्देशानुसार होत असलेल्या मुंबई महानगरपालिकेच्या २२७ प्रभागांसाठी आज सोडत काढण्यात आली. या सोडतीने विविध राजकीय पक्षांतील अनेक दिग्गजांना फटका बसला, यामध्ये माजी महापौर, स्थायी समितीचे अध्यक्ष तसेच गटनेत्यांचा समावेश आहे. आरक्षण बदलामुळे अनेक नव्या चेहऱ्यांना संधी मिळण्याची शक्यता आहे.
वांद्रे येथील बालगंधर्व रंगमंदिर सभागृहात आज ही सोडत काढण्यात आली. यामध्ये २२७ प्रभागांतील ११४ प्रभाग हे महिलांसाठी राखीव, तर अनुसूचित जाती-जमातींसाठी एकूण १५ प्रभाग राखीव आहेत. यामध्ये अनुसूचित जातीच्या महिलांसाठी आठ प्रभाग आरक्षित, अनुसूचित जमातीसाठी दोन प्रभाग राखीव असून, त्यापैकी एका ठिकाणी महिला उमेदवारासाठी आरक्षण आहे, तर अनुसूचित जातींसाठी (ओबीसी) मुंबईतील ६१ वॉर्ड राखीव ठेवण्यात आले, यामध्ये ३१ महिला अनुसूचित जाती महिलांसाठी आरक्षित आहेत, तर सर्वसाधारण प्रवर्गाच्या उमेदवारांसाठी ६१ प्रभाग राखीव आहेत. यामध्ये सर्वसाधारण प्रवर्गाच्या ३१ प्रभाग महिलांसाठी आरक्षित आहेत. सोडत जाहीर झाल्याने विविध राजकीय पक्ष आता निवडणुकीसाठी तुल्यबळ उमेदवार देण्याची तयारी करीत आहेत.