परदेशी पाहुण्यांच्या आगमनाचे वेध
वातावरणातील बदलांमुळे फ्लेमिंगोंची उरणकडे पाठ
उरण, ता. १३ (वार्ताहर)ः उरण खाडीकिनारी पाणथळांवर दरवर्षी हजारोंच्या संख्येने येणारे फ्लेमिंगोंचे दर्शन दुर्लभ झाले आहे. वातावरणातील सततच्या बदलांमुळे नोव्हेंबरमध्ये येणारे परदेशी पाहुणे अजूनही आले नसल्याने पक्षीप्रेमींना आगमनाचे वेध लागले आहेत.
उरणला मोठा समुद्र भाग लाभला आहे. जेएनपीए बंदर परिसरात पाणजे पाणथळ, डोंगरी, नवीन शेवा, करंजा, न्हावा येथील पाणथळे स्थलांतरित पक्ष्यांची आश्रयस्थाने आहेत. या जलाशयातील कीटक, खुबे, मासे, शेवाळ मोठ्या प्रमाणात असल्याने हिवाळा सुरू होताच दरवर्षी हजारोंच्या संख्येने फ्लेमिंगो या ठिकाणी मुक्काम करतात, पण सततच्या वातावरण बदलामुळे यंदा नोव्हेंबर सुरू झाला तरी पक्षी अजूनही दाखल झालेले नाहीत.
----------------------------------
ग्रेटर फ्लेमिंगो ः या पक्ष्याचे वजन साधारण पाच किलोपर्यंत असते. त्याची उंची १२५-१४५ पंख विस्तार १४०-१६५ सेमीपर्यंत असतो. नील-हरित शेवाळ, लहान मृदुकाय प्राणी यांचे खाद्य असते, तर प्रजनन काळ संप्टेबर-आक्टोबर किंवा फेब्रुवारी ते एप्रिल हा असतो.
लेझर फ्लेमिंगो - या पक्ष्याचे वजन १.५ ते २ किलोग्रॅम, उंची ८०-९० सेमी, पंख विस्तार ९५ ते १०० सेमीपर्यंत असतो. ग्रेटर फ्लेमिंगो आणि लेसर फ्लेमिंगो. यामध्ये ग्रेटर फ्लेमिंगोंची संख्या अधिक असते.
---------------------------------
स्थलांतरित पक्ष्यांचे आश्रयस्थान
फ्लेमिंगो व्यतिरिक्त शॉवेलर डक, हॅरिअर, लॉकेस, नॉब्रबँन, रॅडिश सेल डक, मार्श हॅरिअर, पेंटेड स्टार्क, स्मूनबील, सँड पायपर सह देशी पाण कोंबडे, करकोचे, बगळे, पाणकावळे मोठ्या प्रमाणात येतात. हिवाळा संपला की मार्चमध्ये हे पक्षी येथून स्थलांतर करतात. मात्र, यंदा पक्ष्यांना उशीर झाला असल्याने पक्षीप्रेमींमध्ये नाराजी आहे.