डेब्रिजची धोकादायक वाहतूक
कळंबोली-बेलापूर महामार्गावरील प्रकार
नवीन पनवेल, ता. १३ (बातमीदार)ः कळंबोली ते बेलापूर महामार्गावर डम्परमधून डेब्रिजची धोकादायक वाहतूक केली जात आहे. अनेकदा प्रमाणापेक्षा जास्त माती, दगडाची वाहतूक केली जात असून वाहतूक पोलिसांच्या दुर्लक्षामुळे अपघातांची शक्यता आहे.
पनवेल-सायन महामार्गावर कळंबोली ते बेलापूर, कामोठे, तळोजामार्गे जाणाऱ्या वाहनांची संख्या मोठी आहे. अशातच डम्परमधून धोकादायकरीत्या दगड, माती वाहतूक केली जात आहे. अनेकदा दगड, माती, खडी रस्त्यावर पडून अपघात होत आहेत. तसेच हवेत माती प्रदूषणदेखील वाढले आहे. अनेकदा डम्परमधील दगड रस्त्यावर पडत असल्याने अपघात होण्याची शक्यता नाकारता येत नाही. याविषयी अनेकदा तक्रारी करण्यात आल्या असल्या तरी त्याकडे दुर्लक्ष केले जात असल्याची माहिती कळंबोलीचे प्रशांत रणवरे यांनी केली आहे.