रिक्षाचालकाचा दुचाकीस्वारावर हल्ला
सकाळ वृत्तसेवा
डोंबिवली, ता. १३ ः डोंबिवली पूर्व येथील बाजी प्रभू चौकात रस्त्याच्या मध्यभागी रिक्षा उभी केल्याचा जाब विचारल्याने रिक्षाचालक संतापला. त्याने जाब विचारणाऱ्या दुचाकीस्वाराच्या कपाळावर पेव्हर ब्लॉक मारून गंभीर जखमी केले. ही घटना रविवारी रात्री घडली.
गणेश हनमंत इदाते (वय ३६) असे जखमीचे नाव आहे, तर शिवम पवार (वय २१) असे रिक्षाचालकाचे नाव आहे. इदाते हे पत्नी आणि लहान मुलासमवेत खरेदी करून घरी जात होते. या वेळी रस्त्यात उभ्या असलेल्या रिक्षाचालकाला त्यांनी वाहन बाजूला घेण्यास सांगितले. याचा राग आल्याने पवार यांनी शिवीगाळ करून ठोशाबुक्क्यांनी मारहाण केली. तसेच रस्त्यावरील पेव्हर ब्लॉक उचलून इदाते यांच्या कपाळावर मारला. या हल्ल्यात इदाते गंभीर जखमी झाले. पुढील तपास रामनगर पोलिस करीत आहेत.