‘सकाळ’तर्फे सोमवारी विविध शाळांमध्ये ज्ञानेश्वरी पठण कार्यक्रम
मुंबई, ता. १३ : श्री संत ज्ञानेश्वर महाराज संजीवन समाधी उत्सव दिनाचे औचित्य साधून ‘सकाळ एनआयई’ आणि ‘सकाळ भक्ती शक्ती व्यासपीठा’च्या वतीने विद्यार्थ्यांसाठी सामूहिक ‘ज्ञानेश्वरी पठण-संस्कार आणि विचारांची दिशा’ हा उपक्रम सोमवारी (ता. १७) विविध शाळांमध्ये आयोजित केला आहे. विद्यार्थ्यांना ज्ञानेश्वर महाराजांच्या विचारांचा आणि ज्ञानेश्वरी ग्रंथातील मूल्यांचा परिचय करून देणे, त्यांच्यात संस्कार, विचारशीलता आणि मराठी भाषेचा अभिमान निर्माण करणे, हा या उपक्रमाचा उद्देश आहे.
या उपक्रमात विद्यार्थ्यांकडून ज्ञानेश्वरी ग्रंथातील निवडक ओव्यांचे सामूहिक पठण केले जाईल. त्यानंतर शाळेतील शिक्षक किंवा विद्यार्थी त्या ओव्यांचा अर्थ आणि भावार्थ समजावून सांगतिल. हा उपक्रम साधारणतः ३० मिनिटांचा असून, त्यात पालकांचाही सहभाग ​असणार आहे. ओव्यांचा भावार्थ समजावून सांगणारा विद्यार्थी शक्यतो ज्ञानेश्वरांच्या पोशाखात, तर सहभागी विद्यार्थी वारकरी पारंपरिक पोशाखात सहभागी होणार आहे. शालेय विद्यार्थ्यांमध्ये वाचनाची आवड वाढावी, त्यांचे भाषिक ज्ञान समृद्ध व्हावे आणि आध्यात्मिक संवेदना विकसित व्हाव्यात, या हेतूने हा उपक्रम ‘सकाळ’ विविध शाळांमध्ये राबवित आहे. या उपक्रमाला आळंदीच्या श्री ज्ञानेश्वर महाराज समाधी संस्थानचे विश्वस्थ ह. भ. प. भावार्थ देखणे यांचे सहकार्य लाभले आहे.स