गांधी नगर जंक्शन येथे वाहतूक शाखेच्या कंटेनरला आग
घाटकोपर, ता. १६ (बातमीदार) ः पार्कसाईट पोलिस ठाणे अंतर्गत येणाऱ्या गांधी नगर जंक्शन परिसरातील वाहतूक शाखेच्या तात्पुरत्या स्वरूपातील कंटेनर कार्यालयाला आज (ता. १६) सकाळी ११.४५ वाजता अचानक शॉर्टसर्किटमुळे आग लागली. आगीची माहिती मिळताच अग्निशमन दलाने तातडीने घटनास्थळी धाव घेत आग विझवली.
सुदैवाने या घटनेत कोणतीही जीवितहानी झाली नाही, मात्र कंटेनरमध्ये कर्तव्यावर असलेल्या अंमलदारांचे काही खासगी कपडे, बॅग, किरकोळ साहित्य तसेच काही कार्यालयीन कागदपत्रे आगीत जळून नष्ट झाली आहेत. घटनास्थळी तत्काळ पार्कसाईट पोलिस ठाणे तसेच वाहतूक शाखेचे अधिकारी आणि अंमलदार यांनी उपस्थित राहून परिस्थितीचा आढावा घेतला. आगीमुळे झालेल्या नुकसानीचा पंचनामा सुरू असल्याची माहिती पार्क साईट पोलिस ठाण्याचे वरिष्ठ पोलिस निरीक्षक संतोष घाटेकर यांनी दिली.