कल्याण पूर्वेत भिम महोत्सवाला सुरुवात
डॉ. आंबेडकर जयंती महोत्सव समितीचे कल्याण पूर्वेचे आयोजन
कल्याण, ता. १६ (वार्ताहर) : डॉ. बाबासाहेब आंबेडकर सार्वजनिक जयंती महोत्सव समिती यांच्या विद्यमाने कल्याण पूर्वेत शुक्रवार (ता. १४)पासून भिम जयंती महोत्सवाला सुरुवात झाली आहे. सहाय्यक पोलिस आयुक्त कल्याण घेटे यांच्यासह नागरिकांनी वंदना करून महोत्सवाला प्रारंभ केला.
कल्याण पूर्वेतील ड प्रभाग कार्यालयाजवळील डॉ. बाबासाहेब आंबेडकर ज्ञान केंद्राच्या प्रांगणात हा महोत्सव १४ ते १७ नोव्हेंबर या कालावधीत आयोजित केला आहे. भिम महोत्सवात गायकांच्या माध्यमातून समाज प्रबोधन करण्यात येत आहे. कार्यक्रमाचे आयोजन यावर्षीचे जयंती उत्सव समिती अध्यक्ष सुमेध हुमणे, सचिव आतिष गायकवाड, कोषाध्यक्ष राजू रोकडे यांच्या समितीने ज्येष्ठ नेते अण्णासाहेब रोकडे आणि देवचंद अंबादे यांच्या मार्गदर्शनाखाली केले आहे. या महोत्सवाअंतर्गत द बिट्स ऑफ संघा हा सांगीतिक कार्यक्रम सादर करण्यात आला.
या कार्यक्रमाअंतर्गत स्मारक निर्मितीसाठी योगदान देणाऱ्यांसह कल्याण-डोंबिवली परिसरातील अनेक प्रशासकीय अधिकारी, पोलिस अधिकारी यांच्या सत्काराचे आयोजन केले आहे. महाराष्ट्रातील सुप्रसिद्ध गायक साजन ब्रेंदे, गायिका कडूबाई खरात यांचा प्रबोधनात्मक संगीतमय कार्यक्रम शनिवारी पार पडला, तर रविवारी सुप्रसिद्ध इतिहास अभ्यासक श्रीमंत शिवाजी कोकाटे यांचे भारताचे आधरस्तंभ छत्रपती शिवाजी महाराज आणि डॉ. बाबासाहेब आंबेडकर यांच्या जीवनावर आधारित व्याख्यान होईल. या व्याख्यानानंतर क्रांतिकारी शितल साठे, शाहीर सचिन माळी यांच्या कार्यक्रमांचे आयोजन केले आहे.
सोमवारी (ता. १७) सुप्रसिद्ध निवेदिका पूजा मळेगावकर यांचा सौभाग्यवती २०२५ खेळ रंगला पैठणीचा हा महिलांसाठीच्या होम मिनिस्टर चा खास कार्यक्रम पार पडणार आहे. या कार्यक्रमास नागरिकांनी मोठ्या संख्येने उपस्थित राहण्याचे आवाहन आयोजकांच्या वतीने करण्यात आले आहे.