उल्हासनगरात धार्मिक विधीच्या नावाखाली २४ लाखांची फसवणूक

उल्हासनगर, ता. १६ (वार्ताहर) ः उल्हासनगर कॅम्प ४ परिसरातील एका ज्येष्ठ महिलेची धार्मिक विधी, होमहवन आणि विघ्ननाशाच्या बहाण्याने २४ लाख ६० हजार रुपयांची फसवणूक करण्यात आली. हा प्रकार जानेवारी २०२३ ते ११ नोव्हेंबर २०२५ या कालावधीत करण्यात आला आहे. याप्रकरणी विठ्ठलवाडी पोलिस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार शकुंतला आहुजा (वय ७०) यांचा विश्वास संपादन करून मुख्य आरोपी करिश्मा हिने त्यांना रूम मिळवून देण्याच्या बहाण्याने १० लाख रुपये घेतले. त्यानंतर विविध धार्मिक विधी, होमहवन, ‘विघ्न दूर करणारा बाबा’ व ‘बागेश्वर धाम’ येथील पूजेचे खोटे प्रलोभन दाखवले. तसेच वेळोवेळी आठ तोळे वजनाचे सोन्याचे दागिने, १० ग्रॅम हिरे, तसेच रोख रक्कम, असे एकूण २४ लाख ६० हजार रुपये घेतले, तर ११ नोव्हेंबरला बागेश्वर धामच्या बाबाचा प्रसाद असल्याचे सांगून फिर्यादीला मिठाई दिली. त्या मिठाईत गुंगीकारक पदार्थ मिसळून शकुंतला यांना बेशुद्ध केले. त्यांच्या हातातील २० ग्रॅम वजनाची सोन्याची बांगडी आरोपींनी काढून घेतली. यामध्ये एकूण आठ जणांचा समावेश असून, त्यांची नावे करिश्मा, साहिल, गोली, उपा, उषाचा मुलगा यश, लविना, कशिश, गुरुजी नावाचा व्यक्ती यांचा समावेश आहे.